Home / Entertainment / Cinema / యాత్ర’ ఫస్ట్ డే కలెక్షన్స్

యాత్ర’ ఫస్ట్ డే కలెక్షన్స్

ఆంధ్రప్రదేశ్ మాజీ ముఖ్యమంత్రి, దివంగత వైఎస్ రాజశేఖర్‌రెడ్డి బయోపిక్‌గా తెరకెక్కిన ‘యాత్ర’ శుక్రవారం(ఫిబ్రవరి 8) ప్రేక్షకుల ముందుకొచ్చిన సంగతి తెలిసిందే. ప్రపంచవ్యాప్తంగా 970 థియేటర్లలో ఈ సినిమాను విడుదల చేశారు. క్రిటిక్స్ నుంచి మిక్స్‌డ్ రివ్యూలు వచ్చినప్పటికీ ప్రేక్షకులు మాత్రం ఈ సినిమాపై పాజిటివ్‌గా స్పందిస్తున్నారు. తమ నేతను మరోసారి గుర్తుకుతెచ్చారంటూ వైఎస్ అభిమానులు యూనిట్‌పై ప్రశంసలు కురిపిస్తున్నారు.

2003లో వైఎస్సార్ చేపట్టిన పాదయాత్ర నేపథ్యంలో దర్శకుడు మహి వి.రాఘవ్ ఈ సినిమాను తెరకెక్కించారు. వైఎస్ పాత్రను మలయాళ సూపర్‌స్టార్ ముమ్ముట్టీ పోషించారు. ఆ పాత్రలో ఆయన నటించారనడం కంటే జీవించారనే చెప్పొచ్చు. రావు రమేష్, అనసూయ, జగపతిబాబు తదితరులు కీలక పాత్రల్లో నటించారు. తెలుగుతో పాటు తమిళ, మలయాళ భాషల్లో ఈ సినిమా విడుదల చేశారు.

తొలి షో నుంచే పాజిటివ్ టాక్ సొంతం చేసుకున్న యాత్ర కలెక్షన్లు కూడా బాగానే రాబట్టింది. తొలిరోజు తెలుగు రాష్ట్రాల్లో రూ.4కోట్లు వసూలు చేసినట్లు ట్రేడ్ నిపుణులు చెబుతున్నారు. తమిళ, మలయాళంలోనూ మంచి కలెక్షన్లు రాబట్టినట్లు తెలుస్తోంది. యూఎస్‌లో ప్రీమియర్ షోల ద్వారా 71,289 డాలర్లు, ఫస్ట్ డే 100 లొకేషన్లలో 23,320 డాలర్లు వసూలు చేసినట్లు రిపోర్టులు చెబుతున్నాయి. హిట్ టాక్ రావడంతో తొలి వీకెండ్‌లోనే ‘యాత్ర’ బ్రేక్ ఈవెన్ సాధిస్తుందని యూనిట్ చెబుతోంది.