శ్రీవారి సేవా టిక్కెట్ల కేటాయింపులో భారీ మార్పులు.. అక్రమాలకు చెక్!

శ్రీవారి సేవా టికెట్ల కేటాయింపులో టీటీడీ కీలక మార్పులు తీసుకొచ్చింది. పాత విధానంలోని లోపాలను అక్రమార్కులు తమకు అనుకూలంగా మలచుకుని వేలాది టిక్కెట్లను పొందుతున్నారు. ఇటీవల సేవా టిక్కెట్ల కేటాయింపులో అక్రమాలు వెలుగుచూడటంతో టీటీడీ కొత్త నిబంధనలు రూపొందించింది. విజిలెన్స్‌ విభాగం సిఫార్సుల మేరకు రూపొందించిన తాజా నిబంధనలు నవంబర్‌ నెలలో విడుదల చేసిన సేవా టికెట్లకు వర్తింపజేసింది. ఫిబ్రవరి నెలకు సంబంధించిన శ్రీవారి వివిధ ఆర్జిత సేవలకు 67,146 టికెట్లను టీటీడీ శుక్రవారం విడుదల చేసింది. కొత్త నిబంధన ప్రకారం.. ఒక మెయిల్‌ ఐడీ, ఒక ఫోన్‌ నెంబరుతో మాత్రమే బుక్‌ చేసుకోవాలి. గతంలో ఈ విధానం లేకపోవడంతో వందలాది నకిలీ ఐడీలతో పేరు నమోదు చేసుకోవడం, ఎలక్ట్రానిక్‌ లాటరీ విధానంలో టిక్కెట్లు దక్కించుకుని, వాటిని ఇతరులకు అమ్ముకొని సొమ్ము చేసుకోవడం తెలిసిందే.

కొత్త విధానం గురించి టీటీడీ ఈవో అనిల్‌కుమార్‌ సింఘాల్‌ వెల్లడించారు. ఫిబ్రవరి నెల కోటాకు సంబంధించి 67,146 టికెట్లను విడుదల చేయగా, ఇందులో 9,796 సేవా టికెట్లు ఆన్‌లైన్ డిప్ ద్వారా అందుబాటులోకి తెచ్చింది. వీటిలో సుప్రభాత సేవ 7,096, తోమాల సేవ 110, అర్చన 110, అష్టదళ పాదపద్మారాధన సేవ 180, నిజపాదదర్శనం 2,300 టికెట్లు చొప్పున ఉన్నాయి. కల్యాణోత్సవం, ప్రత్యేక దర్శనం, సహస్రదీపాలంకరణ సేవ టిక్కెట్లను ఆన్‌లైన్‌లో నేరుగా పొందవచ్చు. తిరుచానూరు పద్మావతి అమ్మవారి కార్తీక బ్రహ్మోత్సవాలు డిసెంబరు 4 నుంచి 12 వరకు నిర్వహించనున్నట్లు ఈవో సింఘాల్‌ తెలిపారు. అమ్మవారి బ్రహ్మోత్సవాల్లో భాగంగా డిసెంబరు 4న ధ్వజారోహణం, 8న గజవాహనం, 9న గరుడవాహనం, 11న రథోత్సవం, 12న పంచమీతీర్థం వేడుకలు ఉంటాయి.

తపాలాశాఖ ద్వారా ఇటీవల ప్రారంభించిన శ్రీపద్మావతి అమ్మవారి ‘ఆశీర్వచనం’ పథకం కింద చిత్రపటం, పసుపు, కుంకుమ, అక్షితలు స్వీకరించేందుకు భక్తుల నుంచి స్పందన వస్తోందని, మూడురోజుల్లో 250 మందికిపైగా ఆశీర్వచనం అందించామని ఈవో వివరించారు. మరోవైపు తిరుమలలో ప్లాస్టిక్ నిషేధం నవంబరు 2 నుంచి అమల్లోకి వచ్చింది. ప్లాస్టిక్ కవర్లను నిషేధిస్తూ తీసుకున్న నిర్ణయాన్ని కఠినంగా అమలు చేస్తామని టీటీడీ వెల్లడించింది. దీన్ని ఎవరైనా ఉల్లంఘిస్తే రూ.5 వేల నుంచి రూ.25 వేల వరకు జరిమానా విధిస్తామని తెలిపింది. ఇప్పటికే తిరుమలలో ఉన్న దుకాణాలు, హోటళ్లకు టీటీడీ హుకుం జారీచేసింది.

apteka mujchine for man ukonkemerovo woditely driver.