బయో డైవర్సిటీ కారు ప్రమాదం: మృతురాలి కుటుంబానికి రూ.5 లక్షల నష్టపరిహారం

హైదరాబాద్‌లోని హైటెక్ సిటీ వద్ద బయోడైవర్సిటీ ఫ్లైఓవర్‌ కారు ప్రమాదంలో మరణించిన మహిళ కుటుంబానికి తెలంగాణ ప్రభుత్వం రూ.5 లక్షల పరిహారాన్ని అందించింది. ఫ్లైఓవర్ పైనుంచి పల్టీ కొట్టిన కారు కింద బస్సుకోసం వేచి చూస్తున్న మహిళపై పడడంతో ఆమె మరణించిన సంగతి తెలిసిందే. ఈ ఘోర ప్రమాదంలో పశ్చిమ గోదావరి జిల్లాకు చెందిన పసల సత్యవాణి మరణించారు. దీంతో అప్పుడే ఈమె కుటుంబానికి తెలంగాణ ప్రభుత్వం రూ.5 లక్షల పరిహారాన్ని ప్రకటించింది. ఈ మేరకు మంగళవారం ఆమె కుటుంబానికి అధికారులు చెక్కును అందజేశారు. సత్యవాణి కుమార్తె నాగప్రణీత పేరు మీద ఉన్న చెక్కును ఆమె మేనమామ చక్రవర్తికి అందించారు. హైదరాబాద్ మేయర్‌ బొంతు రామ్మోహన్‌ జీహెచ్‌ఎంసీ కార్యాలయంలో మంగళవారం ఈ చెక్కును అందజేశారు.

ఇదే ప్రమాదంలో తుంటికి పెద్ద గాయమై ఆస్పత్రిలో చికిత్స పొందుతున్న అనంతపురం జిల్లాకు చెందిన కుబ్ర బేగంకు (23) వైద్య ఖర్చుల కోసం ఇటీవల రూ.3.5 లక్షలు చెల్లించామని మేయర్‌ వెల్లడించారు. ఆమె పూర్తిగా కోలుకునే వరకూ అయ్యే ఖర్చులను జీహెచ్‌ఎంసీ తరఫున భరిస్తామని రామ్మోహన్ చెప్పారు.

నవంబరు 23న హైదరాబాద్‌లో జరిగిన ఈ కారు ప్రమాదం దేశవ్యాప్తంగా సంచలనమైన సంగతి తెలిసిందే. దాదాపు 105 కిలోమీటర్ల వేగంతో మెరుపులా దూసుకెళ్లిన కారు, మూల మలుపు వద్ద అదుపు తప్పి, 19 మీటర్ల ఎత్తులో ఉన్న వంతెన పై నుంచి కిందికి పల్టీలు కొట్టింది. సమీపంలోని బస్టాపులో బస్సు కోసం వేచి చూస్తున్న మహిళపై కారు పడిపోవడంతో.. ఆ మహిళ అక్కడికక్కడే కన్న కూతురి ఎదుటే ప్రాణాలు కోల్పోయింది. ఈ ఘటనలో మరో నలుగురికి కూడా గాయాలయ్యాయి. ఎయిర్ బెలూన్లు తెరుచుకోవడంతో కారు నడుపుతున్న వ్యక్తి గాయాలతో బయటపడ్డాడు.

ఈ ప్రమాదం జరిగిన వెంటనే మృతి చెందిన సత్యవేణి కుటుంబానికి మేయర్ బొంతు రామ్మోహన్ రూ.5 లక్షల పరిహారం ప్రకటించారు. ఈ ఘోర ప్రమాదానికి కారు అధిక వేగంతోపాటు, ఫ్లైఓవర్ డిజైన్ కూడా కారణమని ఆరోపణలు వెల్లువెత్తాయి. ఎక్కువ మలుపులు లేని డిజైన్ కోసం స్థల సేకరణ చేయాల్సి ఉండడంతో, అధికారులు దాని జోలికి పోలేదని కూడా వార్తలు వచ్చాయి

336X280:

Leave a Reply

Your email address will not be published. Required fields are marked *

*